வேலூர் மாநகராட்சியில் ஆளும் திமுகவிற்குள் புகைந்து கொண்டிருக்கும் உட்கட்சிப் பூசல் தற்போது வெளிச்சத்திற்கு வந்துள்ளது. மேயர் சுஜாதாவின் செயல்பாடுகளால் அதிருப்தியில் உள்ள திமுக மண்டலக்குழுத் தலைவர்கள், மக்கள் பணிகளும் முடங்கிவிட்டதாகக் குமுறுகின்றனர். இது அடுத்த தேர்தல் வெற்றிக்கு பெரும் சவாலாக மாறும் என அஞ்சுகின்றனர்.
“வெளியில தலைக்காட்ட முடியல… ஓட்டுப் போட்ட மக்களுக்கும் பதில் சொல்ல முடியல. அடுத்த தேர்தலுக்கு வார்டுக்குள்ள ஓட்டுக் கேட்டுப் போறதே சிரமமாகிடும் போலிருக்கு” – இப்படிப் புலம்புகிறவர்கள் வேறு யாருமல்ல… வேலூர் மாநகராட்சியில் இருக்கும் திமுக-வின் நான்கு மண்டலக்குழு தலைவர்களும் தான். இவர்களை இப்படி புலம்ப வைத்திருப்பவர் திமுக-வைச் சேர்ந்த மேயர் சுஜாதா!
திமுக வசமிருக்கும் வேலூர் மாநகராட்சியில் மேயர், துணை மேயர் 4 மண்டலங்களின் தலைவர்கள் என அனைத்தையும் திமுக-வே கைப்பற்றி வைத்திருக்கிறது. இருந்த போதும், அதிகாரத்துக்கு வந்து மூன்று ஆண்டுகளாகியும் மாநகராட்சியில் பேர் சொல்லும்படியாக எந்தக் காரியமும் நடக்கவில்லை என ஆளும் கட்சி கவுன்சிலர்களே புலம்புகிறார்கள். மக்களின் குறைகளை எடுத்துச் சொல்லி திட்டங்களை செயல்படுத்தலாம் என்றால் மாமன்றக் கூட்டத்தையே 3 அல்லது 4 மாதங்களுக்கு ஒருமுறைதான் கூட்டுகிறாராம் மேயர் சுஜாதா.
மேயர் மீது குமுறல்: செயலிழந்து கிடக்கும் வேலூர் மாநகராட்சி?
இதையெல்லாம் ஆகப் பெரும் குற்றச்சாட்டாக அடுக்கும் மண்டலத் தலைவர்கள், “மேயர் சுஜாதா தனது அதிகாரத்தை பகிர்ந்தளிக்க விரும்பாததால் மாநகராட்சி நிர்வாகமே செயலிழந்து கிடக்கிறது” என்று ஆதங்கப்படுகிறார்கள். இது குறித்து நம்மிடம் பேசிய 1-வது மண்டலக்குழு தலைவர் புஷ்பலதா, “வேலூர் மாநகராட்சியில் மொத்தம் 60 வார்டுகள். இதில், 15 வார்டுக்கு ஒரு மண்டலம் என மொத்தம் 4 மண்டலங்கள் உள்ளன. இந்த 4 மண்டலங்களிலும் மண்டலக்குழுத் தலைவர்களாக திமுக-வைச் சேர்ந்தவர்களே இருக்கிறோம்.
பொதுவாக மாதம் ஒரு முறை மண்டலக்குழுக் கூட்டம் நடத்த வேண்டும். இதில், அந்தந்த மண்டலத்துக்கு உட்பட்ட 15 வார்டுகளின் கவுன்சிலர்கள் கலந்து கொண்டு தங்களது வார்டுக்கு தேவையான வசதிகள் குறித்தும், அடிப்படை தேவைகள் குறித்தும், வளர்ச்சிப் பணிகள் குறித்தும் கோரிக்கைகளை முன்வைப்பார்கள். அதை பரிசீலித்து ஒரு வார்டுக்கு தலா ரூ.5 லட்சத்துக்கான பணிகளை செய்து முடிக்க மண்டலக்குழுக் கூட்டத்திலேயே தீர்மானம் நிறைவேற்றி அதை செயல்படுத்தும் அதிகாரம் மண்டலக்குழு தலைவருக்கு உண்டு.
அதன்படி, கடந்த 2022-ல் ஒவ்வொரு மண்டலத்திலும் 2 கூட்டங்கள் நடத்தப்பட்டன. ஆனால், அதில் நிறைவேற்றப்பட்ட தீர்மானங்கள் எதையுமே செயல்படுத்த மாநகராட்சி நிர்வாகம் முன்வரவில்லை. மண்டலக்குழுக் கூட்டத்தில் நிறைவேற்றப்பட்ட தீர்மானங்களை மாமன்றக் கூட்டத்தில் வைத்து அங்கும் அது நிறைவேறினால் தான் நிதி ஒதுக்கீடு செய்து பணிகள் செய்ய அனுமதி வழங்கப்படும் என மேயர் தரப்பில் சொல்கிறார்கள். அதேசமயம், ஏற்கெனவே செய்துமுடிக்கப்பட்ட பணிகளுக்கு பணத்தைப் பட்டுவாடா செய்யாததால் அடுத்தடுத்த பணிகளை எடுத்துச் செய்ய யாரும் முன்வர மறுக்கிறார்கள். இதனால், அடுத்தடுத்த மண்டலக் கூட்டங்களை எங்களால் நடத்த முடியவில்லை.
மாதம் ஒரு முறை மாமன்றக் கூட்டத்தை கூட்டினால் அங்கு எங்களின் குறைகளை தெரிவிக்கலாம். ஆனால், அதற்கும் சிக்கலை ஏற்படுத்தும் விதமாக 3 அல்லது 4 மாதங்களுக்கு ஒரு முறை தான் மாமன்ற கூட்டத்தையே கூட்டுகின்றனர். மேயரைப் பார்ப்பதே குதிரைக் கொம்பாக உள்ளது. அப்படியே பார்த்தாலும் எங்கள் வார்டுகளின் பிரச்சினையை எடுத்துச் சொன்னால், ‘ஆணையரைப் பார்த்துப் பேசுங்கள்’ என்று சொல்லி எங்களை அலைக்கழிக்கிறார் மேயர்.
இதனால், ஓட்டுப்போட்ட சனங்களுக்கு பதில் சொல்ல முடியாமல் கவுன்சிலர்கள் எங்களிடம் வந்து குறைகளைச் சொல்கிறார்கள். பிரச்சினையே ஒட்டுமொத்த அதிகாரத்தையும் தானே வைத்திருக்க வேண்டும் என மேயர் சுஜாதா நினைப்பது தான். அந்தளவுக்கு சுயமாக சிந்திக்க விடாமல் வெளியில் இருந்து சிலர் அவரை இயக்குகிறார்கள். அவர்கள் சொல்வதைக் கேட்டுக் கொண்டு மண்டலத் தலைவர்களுக்கு அதிகாரத்தை பகிர்ந்தளிக்க தயங்குகிறார் மேயர். இதனால், எங்களை மண்டலக் குழு கூட்டத்தையும் நடத்தவிடாமல் தடுக்கிறார்.
ஆட்சிக்கு அவப்பெயர், தேர்தல் வெற்றி கேள்விக்குறி? – மேயர் சுஜாதா சொல்வது என்ன?
இப்படி மேயரின் நிர்வாக திறமையின்மையால் ஆட்சிக்கு தான் அவப்பெயர் உண்டாகிறது. இதேநிலை நீடித்தால் அடுத்த தேர்தலில் கட்சி பெயரைச் சொல்லி திமுக-வினர் வெற்றி பெறுவது கஷ்டமான ஒன்றாகிவிடும். அந்தளவுக்கு, தனிப்பட்ட செல்வாக்கு உள்ளவர்கள் மட்டும் தான் தேர்தலில் ஜெயிக்க முடியும் என்ற நிலையை மேயர் தரப்பு உருவாக்கிவிட்டது” எனக் கொட்டித் தீர்த்தார் புஷ்பலதா.
மேயர் சுஜாதாவிடம் இதற்கான விளக்கத்தை நாம் கேட்ட போது, “இங்கு யாருடைய அதிகாரமும் பறிக்கப்படவில்லை. மண்டலக்குழுக் கூட்டத்தை அதன் தலைவர்கள் தான் கூட்ட வேண்டும். மண்டலக்குழுக் கூட்டத்தை கூட்டச்சொல்லி நான் பலமுறை அறிவுறுத்தியும் மண்டலக்குழுத் தலைவர்கள் அதை செய்யாமல் உள்ளனர். அதற்கு நான் என்ன செய்ய முடியும்? மண்டலக்குழுத் தலைவர்களுக்கு முழு அதிகாரம் வழங்கப்பட்டுள்ளது. அந்த அதிகாரத்தை வழங்க வேண்டிய ஆணையருக்கும் இது தெரியும்” என்றார்.
கட்சிக்கு களங்கம் உண்டாக்கும் விதத்தில் செயல்படுகிறவர்கள் மீது ஒழுங்கு நடவடிக்கை எடுத்து கட்டம் கட்டும் பொறுப்பில் இருப்பவர் திமுக பொதுச்செயலாளர் துரைமுருகன். அவரது சொந்த மாவட்டமான வேலூரில் நடக்கும் இந்தச் சமாச்சாரங்கள் எல்லாம் அவருக்கு தெரியாதா… அல்லது தெரிந்தும் தெரியாமல் இருக்கிறாரா?
வேலூர் மாநகராட்சி திமுகவில் வெடித்துள்ள இந்த அதிகாரப் போட்டியால் மக்கள் பணிகளே கேள்விக்குறியாகி உள்ளது. தேர்தல் நெருங்கும் வேளையில், இந்த உட்கட்சிப் பூசலுக்கு கட்சித் தலைமை உடனடியாக முற்றுப்புள்ளி வைக்காவிடில், அது திமுகவின் வெற்றி வாய்ப்பை கடுமையாக பாதிக்கும் என அரசியல் நோக்கர்கள் கருதுகின்றனர்.